Gidid-an pagdunggo sa pantalan sa dakbayan sa Dumaguete, Negros Oriental ang usa ka tugboat ug duha ka barge gikan sa Taizhou, China sa miaging gabii.
Si Petty Officer 3 Charelyn Abuyabor, duty officer sa Coast Guard Station-Negros Oriental, miingon nga ang tulo ka barko gipanag-iya sa Industry Movers Corporation (IMC).
Ang tulo nga gitawag og “MTUG IMC 18,” “BARGE IMC 19,” ug “BARGE IMC 20” pulos gama sa China.
Nasayran nga sakay sa naasoyng mga barko ang 11 ka tripolanteng Pinoy nga gitakda untang molandig sa pantalan sa Dumaguete nianang alas 7 sa gabii.
Apan, segun sa tinubdan, ang tagdumala sa Philippine Ports Authority (PPA) sa Dumaguete mibabag sa pagdunggo sa mga vessel ug gimandoan sa pagpundo lang una taliwala sa dagat samtang susihon pa ang ilang dokumento subay sa proper protocol tungod sa hulga sa novel coronavirus.
Walay karga ang nahisgotang mga sakyanan sa dagat apan gidala nganhi sa nasod aron ipaayo.
Sa usa ka press statement, si Mayor Felipe Antonio Remollo sa Dumaguete, chairperson sa Inter-Agency Task Force on Coronavirus, miingon nga ang mga tripolante sa maong mga barko wala tugti nga makagawas o makakanaog sa pantalan.