Gikanselar ni Mayor Joannes Alegado sa Consolacion, Cebu ang gitakdang Centennial Sarok Festival nga gitakda untang magsugod karong adlawa ug ubang susamang kalihokan tungod sa hulga sa novel coronavirus.
Sa iyang pagkanselar sa nag-unang festival sa lungsod, gi-cite ni Alegado ang memorandums gikan sa Department of Health (DOH), Department of Interior and Local Government (DILG) ug Department of Education (DepEd).
Ang naasoyng memo nagmando sa mga Local Chief Executives pagsilbing crisis manager, tumanon ang guidelines nga giluwatan sa mga nasodnong ahensiya labot sa contamination, prevention ug ubang protocols nga angayng tamdan taliwa sa hulga sa 2019-novel Coronavirus o 2019 nCoV.
Matod ni Mayor Alegado, gitahasan usab sila pagpangitag pamaagi nga mapugngan ang pagkatap sa gidudahang nCoV.
Subay niini, miluwat si Alegado og executive order no. 38, series of 2020 nga nagmando sa tanang barangay pagkanselar sa tanang tapok-tapok, likayan ang pagpasiugda og bisan unsang matang sa panagtigum, pag-organisar sa Barangay Emergency Response Team ug pagphigayon og information dissemination campaign sud sa ilang tagsatagsa ka area of jurisdiction.