Nagsamuyo ang mga tag-iya sa 6 ka stalls sulod sa Dipolog City Transport Terminal tungod sa pagkasunog niini kaniadtong Biyernes sa gabie, base na sa taho sa Dipolog City Fire Station.
Nasayrang gilaamoy sa kalayo ang pipila sa mga stalls sa maong terminal bisan paman ug nanirado na kini tungod sa curfew, ug nasayrang anaa sa 50-mil kapesos ang gibana-banang danyos niini.
Nasayran sa pasiunang pagsuta nga faulty electrical wirings ang hinungdan sa maong sunog tungod kay ang ubang appliances sulod sa maong mga stalls wala gipang-ibot sa saksakanan, bisan paman ug sarado na kini.
Nagpasalamat na lamang ang mga tag-iya sa maong mga tindahan nga bisan paman ug dako na gayud sila ug lugi sa nahitabo, atoll pa gayud sa pandemiya, wala ra usab samaran o nakalas nga kinabuhi.
Padayon pa karon ang pagpangita pamaagi sa mga nanag-iya sa mga nasunog nga tindahan ug mga pamaagi aron subli silang makabangon sa maong panghitabo. (OIC Lyza Bautista, RPN DXKD Dipolog)
(Source: Dipolog City Fire Station/Â Bureau of Fire Protection)