Cebu City – Human mapaltos ang byahe unta karong adlawa, gitakda nang mamalik sa biyahe sa dakbayan sa Sugbo ang giilang Hari sa Karsada o tradisyonal nga mga PUJ sugod ugmang adlawa, Nob. 20.
Suma pa sa Cebu City Jeepney Task Force, labing minos 40 ka dyip ug drayber ang gisiksik sa taga LTFRB 7 sa one-stop-shop sa North Reclamation Area.
Sa higayong mahuman na ang inspection, nga gipunting sa roadworthiness sa sakyanan ug katakos sa drayber, makasugod dayon og biyahe ang mga PUJ.
Ang one-stop-shop gilaomang maka-accommodate og hangtod sa 50 ka dyip ug drayber matag adlaw.
Ang unang hut-ong sa mga dyip mao kadtong nag-alagad sa mga sumasakay sa Guadalupe paingon sa Carbon, nga alang sa task force, labing daghan og pasahero samtang ubos pa sa MGCQ o Modified General Community Quarantine ang siyudad.
Matod ni Konsehal James Cuenco, pangu sa task force, adunay 80 ngadto sa 100 ka slots ang rota sa Guadalupe-Carbon apan 40 ray nagpa-swab test busa mao una kiniy managan kon makapasar sa inspection sa roadworthiness.
Midugang si Cuenco nga usa sa mga hinungdan sa wala pagparehistro sa ubang drayber kay ila pang giayo ang ilang yunit para makalusot sa roadworthiness test.
(Jhon Tadlip/JTY, photo courtesy by Nie Arnoco Angco)
(Source: Cebu City – Jeepney Task Force)
