Posibleng dili mahimo ang gilaraw nga pagpangayo og tax exemptions sa mga negosyante karong tuiga.
Mao kini ang pamahayag ni konsehal George Goking atol sa milabayng tigom sa komite sa trade & commerce, human gituki ang mulo sa mga negosyante sa dakbayan sa Cagayan de Oro diin giingong ubay-ubay na nga nagsira nga mga establisamento.
Gibutyag nga sobra na sa usa ka libo ug daghan usab ang nag-convert sa ilang mga patigayon ngadto sa online aron mapadayon ang ilang kapanginabuhian.
Mahinumduman nga pipila ka mga negosyante ang mireklamo kalabot sa operasyon sa maong online business tungod kay wala man kini magbayad sa buhis. Apan, ang buhatan sa DTI namahayag nga daghan na ang online business establishment ang naglukat na og permit sa ilang buhatan.
Dugang niini, aduna usay kabalaka ang mga negosyante nga madungagan ang singilon nga buluhisan sa sunod tuig. Niini, si Goking miingon nga dili sila angayan nga mabalaka kay iyang ipaabot sa buhatan sa konseho ug sa mayor ang maong mulo.
Angayan nga magtinabangay kitang tanan ug magsinabtanay aron mapugngan ang pagkahugno sa ekonomiya, pangamuyo ni konsehal Goking. (Sangguniang Panglungsod)
