Davao City – Dead on arrival sa ospital ang usa ka trabahante human nalumos sa Deca Wakeboard Park sa Deca Homes Resort and Residences nga nahimutang sa Tacunan, Tugbok District Davao City.
Biktima giilang sa Tugbok Police Station nga si James Cuestas Alcuezar, 18-anyos, residente ra usab sa nasangpit nga dapit.
Sa pagpanubay sa otoridad nasayran nga imbes mugamit og improvised boat gilangoy lang sa biktima ang wakeboard lake apan pag-abot niini sa tunga kalit kining naunlod ug nawala sa gibanabanaang 8ft ang gilawmon.
Mihimo pa og search and rescue operation ang mga staff sa nasangpit nga amusement park lakip pamilya ni Alcuezar nga milungtad sa 15 minutos apan wala na kiniy panimoot dihang nakaplagan.
Gidali kini pagdala sa balay tambalanan apan gideklarang dead on arrival sa doktor.
Nasayran nga ang biktima part time worker sa maong wakeboard park.