Davao City– Nagkahiusa ang nagkadaaiyang sector sa katilingban sa syudad sa Davao alang sa paghatag ug igong seguridad sa syudad alang sa gitakda nga Palarong Pambansa nga sugdan karong umaabot nga Abril 27 ngadtu sa Mayo4 ning Kasamtangang tuig. Kini ang gikomperma ni Jenelito Atillo, ang tigpamaba sa Department of Education (DepEd)-Davao nga karon halos tanang mga delegado nangabot na.
“Base sa atong pag-monitor, moabot sa kapin kun kulang 20 mil ka mga delegado ang anaa na sa atong siyudad, diin ang tanang sektor nga molambigit sa Palaro, andam na,” sulti ni Atillo.
Samtang si Ret. Lt. Col. Angel Sumagaysay, deputy head sa Public Safety & Security Command Center, nga andam na ang tanan samtang kapin sa Tres Mil ka mga sakop sa otoridad ang magtinabangay matag adlaw para masiguro ang kahusay ug kalinaw sa aktibidad.
Gipaklaro nga ang opening ceremony pagahimuon na karong Dominggo sa hapon sa sama gihapon nga lugar sa Mintal ning syudad sa Davao. Gisiguro usab sa Davao City Police Office ang seguridad sa mga lugar kung asa nagatulog ang mga atleta.
Gibutyag ni Police Capt. Maria Therisita Plaza-Gaspan, tigpamaba sa DCPO, nga duha ka team nga gilangkuban sa duha ka opisyal ang nakabutang sa matag lugar nga pahulayan ug tuluganan sa mga atleta. Igmat sab nga nag-monitor sa palibot ang kasundalohan ilabi na ang Eastern Mindanao Command (Eastmincom) sa pagseguro nga hapsay ang seguridad sa palibot sa siyudad sa Davao atol sa maong kaugdahan.