Mokabat sa ₱ 42, 545 ang halin sa Taboan sa EGBU o Enhanced Gasang Bahandianon sa Umahan niining semanaha nga anaa nahimutang sa Office of the Provincial Agriculturist, Turno ning dakbayan sa Dipolog.
Kini ang nasayran gikan ni ni Ms. Judy Gondula, ang Team Leader sa Marketing sa E-GBU sa maong buhatan.
Adunay 1, 827 kilos ang nahalin nga produkto gikan sa 15 ka farmers association ning probinsya sa Zamboanga del Norte nga resipiente sa maong programa nga mihatud sa maong taboan kaniadtong Miyerkules, adlaw sa maong tabo.
Kini gilangkuban sa pipino, sili, sikwa, tambuali, kamatis, kalabasa, talong, ampalaya, okra, batong ug sweet corn.
Dugang ni Ms. Gondula nga sa paghiabot sa maong mga produkto sa maong taboan, gidagsa gilayon kini sa resellers kinsa namaligya sa talipapa ug uban pang mamaligya ug utanon dinhi.
Nasayran nga ang maong taboan gimugna kini sa kagamhanang probinsyal pinaagi sa Office of the Provincial Agriculturist isip tabang sa mga resipienteng mag-uuma alang sa pagpalambo sa ilang kapanginabuhian. (OIC Lyza Bautista, RPN DXKD Dipolog)
(Source: Provincial Information Center – Zamboanga del Norte)
