Adunay 98,633 o anaa sa 98% sa mga bata nga nagpangidaron 0-59 months o 5 anyos paubos ang nabakunahan sa 2020 Sabayang Patak Kontra Polio atul sa COVID-19 nga pandemya alang sa round 4 kaniadtong Hulyo 20-Agosto 9, niining tuiga dinhi sa probinsya sa Zamboanga del Norte.
Kini ang nasayran gikan ni Ms. Clarinda Vidallo, ang National Immunization Program (NIP) Coordinator sa Provincial Health Office.
Dugang ni Ms. Vidallo nga sa 25 ka lungsod ning probinsya, nag-una ang lungsod sa Sirawai nga mitala ug 3,867 o 107% sa mga bata nga nabakunahan.
Gisundan kini sa lungsod sa Sergio Osmeña-106%, Jose Dalman ug Polanco-103%, Baliguian-101% ug Katipunan, Salug ug Siocon-100%.
Kini base usab sa report nga gipadala sa matag lungsod ngadto sa maong buhatan.
Nasayran nga ang Sabayang Patak Kontra Polio usa ka nasudnong programa sa Department of Health human gideklarar niini nga adunay polio out break dinhi sa nasud kaniadtong Setyembre 19 tuig 2019.
Dinhi sa Zamboanga del Norte, hingpit kining gisuportahan sa administrasyon ni Governor Roberto Uy.
(OIC Lyza Bautista, RPN DXKD Dipolog)
(Source: Provincial Information Center – Zamboanga del Norte)