Impagunam gunam ni Ilocos Norte Gov. Matthew Marcos Manotoc kadagiti kailian iti panangsurot dagiti naiyetnag a health protocols tapno maliklikan iti adadda pay a panagwaras iti virus.
Segun kenkuana, kasapulan iti tulong ken kooperasyon ti tunggal maysa tapno malabanan ti mapagbutbutngan a sakit.
Namunganay daytoy a panangiyunay-unay ti gobernador iti panagusar iti facemask ken face shield a nayon a proteksion malaksid iti panangobserbar iti social distancing no rumuar iti uneg ti pagtaengan tapno adayu a maakaran iti infection wenno virus kalpasan nga adun iti natiliw a saan a nagusar iti facemask babaen kadagiti uturidad a dagitoy ket nagmulta ken nag community service dagiti awn iti pagbayadna.
Kabayatan na binabalaw ni Sen. Imee Marcos ti Department of Health iti panagusar iti recovery report tapno kaluban iti nangato a bilang dagiti natamaan iti virus a health workers iti nasurok nga uppat a bulan pannakaipatungpal iti community quarantine.
Kuna ti senadora nga arigna pakunsuelo de bobo iti inruar a report ti DOH a 90% kadagiti health workers ti nakarekobre manipud iti sakit.
Kunana a saan a daytoy ti sungbat iti nangato a bilang iti tinamaan ti sakit iti biang dagiti workers kumpara iti sabali a pagilian.
Kuna ni marcos a nupay adadu iti bilang dagiti naapektaran idiay italya ken US kasapulan a maisardeng iti ngumatngato a bilang dagiti maapektaran iti virus.  (Rosita Cainggoy, RPN – DZRL Correspondent)
(Source: Provincial Government of Ilocos Norte – Communications & Media Office)