Nakagawas na sa prisohan sa Surigao City Police Station an suspek nga si Alessandro Coleto human naka piyansa kagahapong adlawa sa korte sa kasong Unjust Vexation.
Kung mahinumduman nga an suspek gi.aresto sa mga tinugyanan sa kapulisan jadton Mayo 31 nan duyom human gibalikas nija an duha ka police officer sa wayay igong rason samtang nagpahigayon nan mobile patrol sa Purok 6, Sitio Banahaw, Brgy. Sabang, SC partikukar sa gawas nan Ohana Blacksand Beach Resort agig paghatag ug seguridad sa maong lugar.
Waya pa makontento an suspek ija tag bunayan an tuo nga pirtahan ug samin sa patrol car hinungdan na alarma an duha ka Police Officer. Sa imbestigasyon ni PCL Jonathan Bugas nga an suspek ubos kini sa impluwensiyang inimnong maka hubog ug bisan pa man nagpakita ug maximum tolerance an an duha ka police officer nagpabilin gehapon nga arongante an suspek rason nga ila kining gi.aresto ug gidaya sa Surigao City Police Station.
An suspek girekomendahan nan piyansa sa kantidad P3, 000 pesos nga gipirmahan ni Hon. Leonila P. Gorgolon an Presiding Judge sa Regional Trial Court, Branch 30, Surigao City pinetsahan Hunyo 4, 2024 sa alas 5:55 nan hapon. (Mark James Lisondra)