Dead on arrival pag abot sa hospital an isa ka 26 anyos na ulitawo human kini aksidenting nadisgrasya sa gimanehong motorsiklo nahitabo sa Borromeo St. Brgy. Taft, SC sa alas 2:00 sa kadlawon kagaina, Mayo 29, 2023.
Nakilay-an an biktima na si Ji-an Paulo Azarcon, layaki, residente sa 536 Roxas St. Brgy. Washington, SC.
Sa report na gipagawas sa kapulisan, nakadawat sila nan tawag gikan sa isa ka concern citizen ug nagpahibayo na jaoy nahitabong aksidente. Dali tag respondihan sa Investigator On Case an maong lugar ug nahibaw-an na an nalambigit isa ka motorsiklo na black Honda Beat125 na wayay plate number.
Sa imbestigasyon ni PSSgt. Alejandro Bonares nasayran na an maong motorsiklo pasingod sa west direction nga diin pag abot sa lugar kung diin nahitabo an disgrasya, aksidenting niliko sa tuong bahin sa karsada ug nibangga sa cargo truck nakaparking na daan.
Tungod niini naka-angkon nan mga samad an biktima ug dali tagdaya sa Caraga Regional Hospital hampan an motorsiklo nakaangkon nan damyos. Gideklarang dead on arrival an biktima pinaagi ni Dr. Ralph Anthony G. Amoncio mga alas 3:02 sa kaadlawon. Hangtod sa pagkakuman nagpadajun pa gehapon an imbestigasyon aron mahibaw-an kung sin-o an tag-ija sa maong cargo truck.
Mark James Lisondra – Ronda 21
RPN DXKS Surigao