General Santos City – Gi-ablihan ang programang gitawag og Lingap at Gabay Pambata (LGP) Cares nga magsilbing CHILDREN’S CRISIS CENTER ilalum sa City Social Welfare and Development Office (CSWDO).
Nahimutang ang maong gambalay sa CSWDO Complex, Barangay Fatima lungsod ug mismo si Gensan City Mayor LORELIE PACQUIAO maoy nanguna sa opisyal nga pag-abli sa LGP-Children’s Crisis Center, kaabag ang mga opisyal ug staff sa CSWDO.
Ang LGP Cares Program o Children’s Crisis Center natukod tungod kay ang lokal nga gobyerno sa General Santos adunay malasakit o pagpakabana sa kaluwasan sa mga bata sa kadalanan, mga bata nga nagpakilimos o naglatagaw sa kadalanan, mga establisemento sa negosyo, ug uban pang publiko nga mga lugar nga nagpameligro sa ilang developmental cycle o siklo sa pag- uswag.
Atol sa seremonya sa maong aktibidad, gilatag ni Jocelyn Arzaga- ang kasamtangang Division Chief sa CSWDO ang mga programa ug serbisyo nga gihatag sa Center sama sa rescue and pull out services, temporary shelter ug daily provisions, case management services, therapeutic program, drug prevention sessions, alternative learning systems ug psychological nga serbisyo.
Kini inabagan matud pa sa General Santos City Police Office (GSCPO) ug ubang mga opisina sa lokal nga pangagamhanan, ingon man mga Non-Government Organizations (NGOs).
Sa mensahe ni Mayor Pacquiao, dako ang iyang pasalamat sa mga social worker sa dakbayan sa ilang dedikasyon sa propesyon ug paggahin og panahon sa pag-atiman sa mga bata nga nanginahanglan.
Dako usab ang kalipay sa mga social worker dihang gipahibalo sa Alkalde nga tukoran usab didto og children’s playground pinaagi sa tabang sa Bobslor Pacquiao Foundation nga gidumala ni kanhi Congressman Bobby Pacquiao nga andam matud pa motabang sa bisan unsa mang dugang gikinahanglan sa naasoy nga Center. (Noel Abelo Jr.)
