Dakung pasalamat sa isa ka retiree ngadto sa Ginoo nga taglamdagan an ija isipan na dili mabiktima sa isa ka grupo nga nagsakay nan puti na SUV nga nagparking kainang udto sa atbang sa HBC duol sa BDO sa may dayan San Nicolas kanto Magallanes.
Marajaw moistorya an isa ka babaje na misugat sa ija samtang pasingod kini sa BDO sa may alauna sa hapon, gikomusta siya ug nangumusta isab sa ija bata iban an pagpakilaya na magbayad kini sa utang sa ija anak. Nagtuo anay an biktima na kilaya gajud sija samtang noiban ini pagsakay sa nakapark na sakyanan. Didto may isa ka babaji na taba an lawas nakig-istorya sa ija hangtud nagpatuo na namaligya ini nan mga alahas daya an pagpakita nan mga pictures sa cellphone. Dinhi na tagpangutana sija kon tinuod ba na diamond an ija bato sa singsing hampan taglang-an na tangtangon an ija mga pulseras aron ila kuhaan nan picture. Nakadumdum na an biktima na isa kini ka modus sa pagpangilad, dali sija nagpasumangil na naghuyat na an ija igsoon na waya pa maniudto ug daling mikanaug sa sakyanan.
Panawagan sa biktima pinaagi sa RPN DXKS na magbantay an mga Surigaonon sa ini na modus sa bodul-bodul tungod kay ania na isab sila kuman sa ato syudad aron mangilad.
An kapulisan sa Surigao City nagpagawas isab nan pahimangno aron wayay mabiktima sa amo na modus.
(RPN DXKS Surigao)