Tuyo ka barangay na sakop sa Hikdop Island an nakatagamtam nan mga libre na serbisyo gikan sa People’s Day program ni Mayor Pablo Yves L. Dumlao II.
Hapit na gajud malukop nan People’s Day Program Year 2 an mga ka-islahan na sakop nan siyudad!
An City Environment and Natural Resources (City ENRO) naghatag nan mga tree seedlings na pwede itanom nan barangay council sanan mga residente para sa ila mga inisyatibo sama sa tree planting. Tagpasabot sab ang mga kagawad sa barangay kung uno ka importante an pagtanom nan mga puno.
Waya sab palabya nan mga katawhan an tagpahigayon na libreng massage, manicure, sanan pedicure nan DSWD – Sustainable Livelihood Program Association (SLPA). Amo sab sa libreng haircut nan Rainbow Connection sanan Philippine National Police.
Si Mayor Paul Dumlao nagpaabot nan ija pasalamat sa mga lumulupyo sa tuyo ka barangay sa ila pagsuporta sa ikaduha na tuig nan People’s Day. “Grabe kadaghan an ato mga services dinhi, kay uno man? It’s because gusto nato maningkamot pagtrabaho, maghatag gajud nan serbisyo,” unod sa mensahe ni Mayor Dumlao.
Nitambong sab sanan nagpakita nan suporta sa programa si City Vice Mayor Alfonso Casurra, City Councilor Christian Noel Catre, Jr., City Councilor Karl Duane Casurra sanan Barangay Captain nan Barangay Washington Christopher Bonite.
Didto sab naghatag nan mensahe pasalamat sila Brgy. Catadman Captain Roberto Diaz sanan Bilabid Brgy. Captain Neger Jariol.
Wayay puas ang suporta sanan pagpasalamat sa duha ka kapitan kay nikadto mismo an Lokal na Panggamhanan sa ila mga barangay, dili na maglisod ang ila mga kabaranggayon sa pagbyahe sa siyudad kay taghasod naman ang mga libreng serbisyo. (Mark James Lisondra)
(Source: Surigao City PIO Facebook page)
