Cebu City- Gimando sa Kapitolyo ang gitawag og telecommuting arrangements sa mga trabahante, pagsuspenso sa dagkong kalihokan sa gawas ug ubang non-essential services.
Uwahing giluwatan ni Gob. Gwendolyn Garcia ang executive order no. 5-K isip dugang measure paglikay sa pagkatap sa coronavirus disease kun Covid 19.
Gimandoan sa EO ang mga opisyal sa kagamhanang local sa lalawigan pagpasera sa pipila ka establisimento nga wala motuman sa social distancing policy sugod karong adlawa.
Kini naglakip sa mga bar, internet cafe, video gaming arcade, gambling facility, barbershop, hair salon, tattoo or piercing parlor, aesthetic center, ug ubang personal care services.
Apil usab gipaundang ang mga home services nga gitanyag sa mga manikyurista, masahista, cosmetologist, aestheticians ug manunupi.
Gitambagan usab sa Kapitolyo ang mga negosyante ug mga non-profit organizations nga naglihok sa Cebu nga magkat-on sa telecommuting o work-from-home sa ilang mga kawani.
Segun sa EO, ang matag employer kinahanglang mopaus-os og katunga sa gidaghanon sa mga trabahante sud sa ilang mga buhatan.