Cebu City – Gibantayan og labing minos 30 ka polis ang usa ka sityo sa bukirang barangay nga unang gihulagway nga “no man’s land” sa mga awtoridad sa Santa Catalina, Negros Oriental tungod sa presensiya sa NPA o New People’s Army.
Kini tungod kay ang Police Regional Office o PRO-7 nagbukas og police substation sa sityo Kakha, Brgy. Talalac sa miaging adlaw.
Suma pa sa director sa PRO 7, Brig. Gen. Ronnie Montejo, magbutang sila og 30 ka polis sa naasoyng police substation aron pagpalig-on sa pagbantay sa kahusay ug kalinaw sa lugar.
Matod ni Montejo, ang substation ang moatiman sa mga mulupyo nga adunay sumbong o reklamo, motabang ug motubag sa mga alarma.
Gipahibawo usab niya nga ang mga polis sa substation paga abagan sa Provincial Police Mobile Force nga magpatrolya sa tibuok lugar.
Midugang si Montejo nga kining maong inisyatiba gisugdan ni General Debold Sinas nga kanhi director sa PRO 7 niadtong 2019 ug karon pangu na sa Philippine National Police. (Jhon Tadlip/JTY)
(News & photo courtesy of: PRO-7)
