Cebu City – Gipahibawo sa Regional Health Office nga nagpaabot sila og laing shipment sa suplay sa COVID-19 vaccines sa Central Visayas karong semanaha.
Si Dr. Mary Jean Loreche, tigpamaba sa Department of Health o DOH-7, mikompirmar sa uwahing virtual briefer nga ang rehiyon posibleng makadawat og bahin sa 500,000 ka doses sa Sinovac nga miabot sa nasod niadtong Abril 22.
Suma pa ni Loreche, mahinamon silang makadawat og dugang alokasyon aron makapadayon na sila sa vaccination rollout.
Hinuon, gitataw niya nga nagpaabot pa sila sa dugang impormasyon sa gidaghanon sa doses sa bag-ong batch sa CoronaVac ang gitagana sa Central Visayas.
Ang mga health officials sa Sugbo nag-atang sa bag-ong shipment sa bakuna para ang mga lokalidad ug pribadong sector makapadayon sa ilang tagsatagsa ka inoculation drives.
Una niini, nahunong ang pagpamakuna sa dakbayan sa Sugbo dihang nahutdan sa suplay sa bakuna.
Base sa record sa Visayas Vaccine Operations Center (VVOC),hangtod sa Abril 22, miabot og 5,793 ka edaran sa Central Visayas ang nadapatan sa first dose sa bakuna.
Ang region 7 adunay kinatibuk-an 572,626 ka senior citizens nga kwalipikado sa libreng vaccination.
(Jhon Tadlip/JTY)
(Source: DOH-7, photo courtesy of Cebu City Public Information Office)