Gutgutigoten ni Gobernador Matthew Marcos Manotoc dagiti pribado a pagadalan a saan pay laeng a mangluklukat iti panagklase dagiti estudiante nangnangruna kadagiti agtawen iti duapulo agpababa.
Inlungalongna ti panangbiruk dagitoy ti wagas para iti pannakaipatungpal ti “Distance Learning” wenno “online classes”
Nupay kasta, inanugotna a problema daytoy kadagiti awanan ti “Intrernet Access” nangnangruna kadagiti awanan ti usaren a “Gadget”.
Mainaig iti daytoy, nagapela ni Gob. Matthew Marcos Manotoc kadagiti maseknan a pagadalan ti panangipaayda ti naan-anay a pannakaawat iti kasasaad dagiti Estudiante.
Segun kenkuana, mabalin met dagiti estudiante ti mangusar kadagiti computer ken internet kadagiti barangay wenno municipal hall
Kinidawna ti panangipalubos dagiti Mayor, punong barangay ken dagiti dadduma pay nga opisial ti panangusar dagiti agad-adal kadagiti nadakamat a pasilidad.
Kabayatanna, inbunannag ti gobernador nga iti biang dagiti mangisursuro ken dagiti dadduma pay nga agserserbi ti pagadalan ket mabalinda ti sumrek babaen iti “Skeletal Force” para iti pannakamantener dagiti nadumaduma a pasdek, kuarto ken dadduma pay .
