Cebu City – Gipahinumdoman sa mga awtoridad ang mga Sugboanon magbantay sa mga tanyag sa investment samtang anaa pa ang quarantine restrictions.
Kini human mag-post ang Securities & Exchange Commission-Cebu Extension Office o SEC-Cebu og 400 porsyento nga usbaw sa gidaghanon sa fraudulent entities ug scam groups nga gi report sa maong buhatan sa unang napu ka buwan.
Segun sa statement nga giluwatan gahapon, SEC-Cebu miingon nga adunay pag-usbaw sa mga investment scams ug ubang matang sa fraudulent activities karong tuiga kon itandi sa milabayng tuig.
Suma pa sa ahensiya, gikan sa Enero ngadto sa Oktubre, nakatala ang komisyon og kapin sa 200 ka fraudulent individuals o entities ug mipagawas og abiso sa maong butang sa ilang official website.
Si Atty. Alma Marie Estrada-Dalena, officer-in-charge sa SEC-Cebu, miingon nga gipahimuslan sa pipila ka badlongon sa katilingban ang pandemic sa pagpangilad sa mga investors.
Matod pa ni Dalena, kinahanglan gyod timbang-timbangon sa makadaghan sa dili pa mo-invest ilabi nag ang entity nagtanyag og dakong bawos o payout. (Jhon Tadlip/JTY)
(Source & Photo: Securities and Exchange Commission-Cebu)
