Cagayan de Oro City – Kapin sa ₱ 401.99 milyones ang gisugyot nga gahin alang sa 20% Development Fund (DF) sa umaabot tuig 2021.
Kini ang nasukip sa 2021 executive budget nga gisumete ni mayor Oscar Moreno ngadto sa konseho sa syudad ubos ni Bise Mayor Kikang Uy.
Lakip sa gipundohan mao ang flood control project balor ₱ 12 milyones; pagsemento sa mga dalan dinha sa barangay Baikingon, Bayanga, Besigan, Cugman, Dansolihon, Lumbia, Pigsag-an, Tablon, Taglimao ug Tagpangi nga mikabat sa ₱ 110 milyones ug pag-abli ug pagpalapad sa dalan gikan sa Pamalihi-Malubog, Lumbia (Phase 8) balor ₱ 21.49 milyones kapin.
Gigahinan usab og ₱ 85 milyones sa umaabot nga tuig ang proyekto pagtukod og flood mitigation structures dinha sa Iponan River, Bigaan River ug Cugman River ug dugang pundo alang sa pagtibawas sa Tablon ug Lumbia Hospital balor ₱ 100 milyones.
Niini, gisugyot usab nga mapatuman sa dakbayan ang proyekto pagtibawas sa ERID Isolation Facility dinha sa barangay San Simon nga naglakip na sa pagpalit ug pag-instalar sa mga gikinahanglang ekipo.
Ang gisumeteng executive budget gipaabot nga tukion sa konseho sa pagpahigayon sa budget hearing karong bulana. (Sangguniang Panlungsod)