Maayong balita alang sa taga Zamboanga del Norte nga buot mo-eskwela sa dakbayan sa Zamboanga apan nagproblema sa bayrunon sa tulunghaan.
Ang Sangguniang Panlalawigan mihatag ug pagtugot ni Governor Roberto Uy sa pagpirma sa Memorandum of Agreement tali na sa Provincial Government of Zamboanga del Norte ug sa Southern City Colleges sa dakbayan sa Zamboanga alang sa Provincial Youth Scholarship Program.
Kini pinaagi sa resolution nga giduso ni 2nd District Board Member Romulo Soliva, atul sa ilang regular session kaniadtong Lunes, Disyembre 7.
Ang maong programa nagtumong aron sa paghatag ug oportunidad sa edukasyon ngadto sa labaw’ng nanginahanglan apan adunay malantip nga panghuna-huna nga mga estudyante ilabi na ang mga kabatan-onan ug indigenous people dinhi sa probinsya.
Ang mga kwalipikadong benepisaryo makadawat sa financial assistance kinsa buot magpa-enroll o mohuman sa 2-year Vocational and Technical Education Program o Bachelor’s Degree Program.
Ang maong scholarship program magbayad sa aktwal nga kantidad sa tuition ug miscellaneous fees sa matag semester nga dili molapas sa ₱ 5,000 alang sa technical vocational education ug P10,000 alang sa bachelor’s degree nga mga kurso. (Provincial Information Center-mbmontederamos)
