Iriga City — Nakatalaan na magkundusir nin inbestigasyon (in aid of legislation) an sangguniang bayan kan Nabua, Camarines Sur sa padagos na pagbulusok sa presyo kan paroy na ikinakalugi kan mga para-oma ngunian.
Ini an nagin pahayag ni konsejal Junjay Fortuna, matapos na hagadon na magin presenti sa sunod na session kan sangguniang an presensya kan Municipal Agriculture Office, representante kan NFA, mga negosyante asin mismo mga para-oma tanganing maaraman kun ano an problema asin magibuhan nin tabang kan local na gobierno kan Nabua.
Magigirumduman na igua na sana ngunian nin 10 pesos na presyo kada kilo nin paroy sa pribadong komprador na enterong ikinalugi kan mga para-oma kan Nabua.
An Nabua saros a mga banwaan sa Rinconada na mahiwas na maray an paroyan asin 80% kan mga namamanwaan an naglalaom asin kinukua an pagbuhay sa pagtanom nin paroy.
(OIC Melvin Barayoga, RPN DZKI Iriga)
Â
(Source: Interview with Hon. Junjay Fortuna- Nabua Camarines Sur)
