Iriga City — Dispuesto an Baao Water District na dugangan an volume kan ipinapabakal na tubig sa Tubig-Nabua na dating NAWAD tangani sanang maresolberan an sobra na sa 20ng taon na problema sa malinig na inumon na tubig sa sinambit ng banwaan.
Iyo ini an siniguro ni GM Vic Robosa kan Baao Water District matapos na maka-olay kan Radyo Ronda matapos na gibohon an inquiry kan Sangguniang Bayan kan Nabua sa Tubig-Nabua na inatinderan kan junta direktiba asin imbitado an opisyal.
Sigun sa saiya, kaya nindang magpabulos nin tubig nin hasta sa 100 mil na cubic meter nin tubig dugang sa dating 47 mil cubic meter nin tubig na binabakal kan Tubig Nabua na magigin bastante sa mga miembros konsumdor kan sinambit ng banwaan.
Siniguro pa ni Robosa na dai man kaini apektado an supply sa mga konsumidor kan Baao, mientras na dakulang volume an kaya kaining bombahon, ara aldaw.
Katakod kaini, positibo man an pagtubod ni Konsejal Junjay Fortuna kan Nabua na aakuon kan Tubig-Nabua an alok kan Baao Water District, imbes na gibohon an plano kaining pagpatindog nin mga pumping station na mahalat pa nin pirang taon.
Inako kan konsejal na talagang haloy ng problema kan banwaan an maluya asin minsan maating inumon na tubig kaya pinalaog sa paagui nin joint venture agreement an Tubig Nabua., alagad dai man giraray naresolberan an problema, imbes mahalat pa nin tulo hasta sa limang taon na ikinadisganar kan mga opisyal kan Nabua, Camarines Sur. (OIC Melvin Barayoga, RPN DZKI Iriga)
(Source: Interview with GM Vic Robosa- Baao Water District)