Davao del Sur: Dakpan ang upat ka lalaki human nadakpang nagpasabong sa Barangay Litos, Sulop, Davao del Sur atol sa Biyernes Santo.
Subay sa report usa ka concerned citizen ang nag report sa Sulop Police Station busa daling gilusad ang hiniusang operasyon sa Kapulisan sa Sulop kauban ang personahe sa CIDG DSPFU aron sa pagsikop sa mga nalambigit niining maong sugal.
Nailhan ang mga dinakpan na sila:
(1) Brian Jims Lecera, 19 years old, single, residente sa Pocaleel, Kiblawan, Davao del Sur,
(2) Allan R Omboy, 42 years old, laborer, residente sa P-3 Brgy Poblacion, Sulop, Davao del sur,
(3) Jenneffer N Endrina, 30 years old, minyo, laborer, residente sa P-6 Brgy Litos, Sulop, Davao del Sur
(4) Benito N Montejo, 74 years old, byudo ug residente sa P-1 Brgy Osmeña, Sulop, Davao del Sur.
Sumala sa imbestigasyon sa Sulop Municipal Police Station, alas dos sa hapon napasiugda ang maong “Tari-Tari” o “Sabong-Sabong” sa P-3 Brgy Litos, Sulop apan sa pag-abot sa pwersa sa Kapulisan kauban ang CIDG DSPFU, nakabantay ang mga nalambigit sa maong sugal ug daling nanagan paingon sulod sa katub-han apan nasikop ang upat niini nga mga kauban.
Dugang sa nasakmit nga mga ebidensiya mao ang desi-otso (18) ka buhi nga ig-tatari nga mga hiniktan, siyam (9) ka mga bihag, tulo (3) ka kulungan sa manok panabong, ug kwarta nga mukabat sa tresyentos dyes pesos (P 310.00).
Sa kasamtangan, ang mga dinakpan ug ang mga nakuhang ebidensiya anaa na karon sa kostudiya sa Kapulisan sa Sulop samtang gina hikay pa sa kapulisan ang mga saktong dokumento aron mapasang-at ang kasong pag supak sa balaod sa Cockfighting Law o (PD 449) ug RA 11332 (an Act on Mandatory Reporting of Notifiable Diseases and Health Events of Public Health Concern).
Gibutyag sa hepe sa Sulop PNP nga si PCpt Harold Untalan nga wala nagkulang sa pagpahimangno ang mga Kapulisan sa Sulop mahitungod sa pagkalambigit sa ginabawal nga sugal ug mga pagtapok-tapok hilabi na sa panahon karon nga ang atong Gobyerno nagpagawas ug mga mando mahitungod sa krisis sa COVID 19, apan aduna gyu’y mga tawo nga malapason ug masupakon sa balaod nga gipatuman sa atong pang-gamhanan.
Giawhag usab sa OIC sa Sulop PNP ang tanan nga musunod sa mga polisiya, aron hapsay ang atong pagpamuyo ug dili mahisama sa mga nadakpan nga nabalhug karon sa prisuhan.