Gipaklaro karon sa kadagkuan sa Department of Health (DOH) nga pabiling walay kaso sa COVID19 dinhi sa Zamboanga Peninsula.
Kini ang gipamahayag ni Dr. Jane Jaug, ang Provincial Health Team Leader sa DOH dinhi sa Zamboanga del Norte atul sa press conference nga gipahigayon sa Isaiah Hall, Provincial Governor’s Office kaniadtong Marso 2 kalabot na sa 8 ka magtutudlo, usa ka supervisor ug usa ka tinun-an sa Department of Education (DepEd) ug laing 5 ka mga kauban niiini kinsa ilawum pa karon sa 14 ka adlaw nga self-quarantine nga nagbyahe gikan sa South Korea.
Si Dr. Esmeralda Nadela, ang OIC sa Provincial Health Office ang nagkanayon usab nga hugot nga nakigkoordinar sila sa DepEd, City Government of Dipolog pinaagi sa City Health Office ug DOH kalabot na sa maong isyu nga mikatap na sa social media.
Dugang ni Dr. Nadela nga ang 15 ka indibidwal kanunay kining gi-monitor sa medical team sa DepEd uban sa pag-supervise sa Surveillance Officer sa DOH ug sa kagamhanang probinsyal.
Si Dr. Virgiilo Batan, ang OIC sa buhatan sa Schools Division Superintendent sa DepEd Dipolog nga ang maong 15 nga taga Dipolog maayo ra ang ilang kahimtang base sa pag-monitor kanila matag adlaw, sa medical team sa maong ahensya sa gobyerno.
Gipasabot ni Dr. Batan nga ang pagbyahe sa maong mga magtutudlo ug supervisor ngadto sa South Korea, personal nila kini ug aduna na silay approved travel order gikan sa Central Office sa DepEd sanglit sa miaging tuig pa kini nilang giplano ug gipa-book.
Gipamahayag usab ni Dr. Batan nga sa ilang paghibalik kaniadtong Pebreo 27, isip COVID19 protocol, gipaadto gilayon sila sa kadagkuan sa DepEd ngadto sa City Health Office isip self- quarantine ug gihatagan sila tanan ug face mask.
Gipaklaro usab ni Dr. Batan nga ang maong mga magtutudlo ug supervisor ilawum kini sa sick leave sulod sa 14 ka adlaw niini nga self-quarantine.
Niini, aduna nay arrangement sa school principal tali na sa ubang teachers kung kinsa ang mo-handle sa ilang klase.
Nasayran nga grabeng pagsaway ang nang-gawas karon sa kahanginan ug social media sa sayup nga impormasyon kalabot sa maong mga indibidwal nga mi-resulta sa pagka panic sa ubang DIpolognon bisan paman aduna nay giluwatan nga Official Statement si Mayor Darel Dexter Uy nga luwas sa COVID19 ang 15 ka indibidwal.
Si Dr. Nadela nag-awhag sa media nga sa gihimong press conference nanghinaut siya nga masabwag ang hustong impormasyon ug maundang ang mikatap nga fake news.
Sa kabahin usab ni Dr. Batan gihangyo na niya ang mga principal karong adlawa (Marso 4) nga mopakita sa ilang pagpakabana ug pag-atiman sa maong mga hintungdang magtutudlo pinaagi sa pag-undang sa pagpasa ug sayup nga impormasyon ug mahukmanon.
Gani, giawhag niya ang mga principal nga mohimo ug intensive advocacy kalabot na sa COVID19 ngadto sa mga magtutudlo ug sa mga magtutungha tungod kay ang mga hintungdang magtutudlo nagkinahanglan sa ilang pagsabot.
Kini isip tubag ni Dr. Batan nga usa sa gi-quarantine nga magtutudlo naapektuhan na ang kaugalingon gumikan sa nahisgutan sa unahan, sanglit ang kauban ra usab nilang magtutudlo ang magsabwag sa sayup nga impormasyon.
Ang 14 ka adlaw nga self quarantine sa 15 ka indibidwal molungtad hangtud Marso 12.