Davao de Oro – Ang Rice harvest sa Davao De Oro posibleng magsugod mga katapusan ning bulan sa Agosto ug entrada sa Setyembre 2020, ug kasagaran sa unang mag harvest sa ilang humayan matud ni PAGRO Chief Minda Agarano kadtong mga Rice Farmers nga nahatagan ni Gov. Jayvee Tyron Uy sa libreng mga semilya, abono, pesticides, fungicide, ug uban pang mga ayuda sa panguma ilalom sa gipakusog niyang “Quick Turn Around (QTA) Project for Rice Production” sa Province of Davao De Oro.
Moabot matud pa niya sa 727 ka mga Rice Farmers nga nag-ugmad sa 1,000 ka ektaryang basakan diha sa lima ka mga rice producing municipalities ang nakabenepisyo sa QTA Project for Rice Production nga parte sa “₱ 15 Million Food Security Plan of Davao De Oro for Covid-19 Health Emergency Situation” nga naaprobahan bag-o lang sa SP DDO sa pagpanguna nila ni Vice Gov. Maricar Zamora ug Senior BM Arturo “Chiongkee” Uy.
Ilalom sa maong proyekto ang probinsya naggahin matud pa niya og ₱ 5,934,000.00 pundo nga gipamalit sa mga synthetic fertilizers, mga Pesticides, ug Fungicides nga gipanghatag sa mga Rice Farmers nga libre.
Apil sad sa mga gipanghatag ang 15,000 ka litrong Diesel Fuel para sa mga tractor nga gigamit sa land preparation sa ilang basakan ug ang 1,000 ka paketeng Bio-N for Rice gikan sa Pasian sa ingon dali ra silang makaani ug mapaneguro ang abundang supply sa bugas nga apektado sa mga restrictions nga gipatuman sa mga checkpoints aron maprotektahan ang kinabuhi sa mga katawhan batok sa makamatayng Covid-19.
Si PAGRO Chief Agarano mihatag sa iyang Food Security Status Report ngadto kang Gov. Tyron Uy atol sa bag-o nahumang Joint Zoom Meeting sa Provincial Inter-Agency Task Force (PIA-TF) for Emerging Infectious Diseases ug sa Provincial Local Health Board (PLHB).
Samtang iyang giklaro nga sa bulan gihapon sa Setyembre magsugod na sad sa ilang harvest ang mga Rice Farmers sa DDO nga nag-ugmad sa laing 11,061 ka ektaryang basakan sa probinsya ubos sa “Rice Regular Planting”. (Gilbert M Cabahug PAO-ID DDO)