Gipadas-og sa mga sakop sa Sangguniang Panlungsod ning dakbayan, ilawom sa pagpangulo ni Bise-Mayor ug Presiding Officer Atty. Senen O. Angeles, ang resolusyon nga naghatag sa gahum ug otoridad ni Mayor Darel Dexter T. Uy nga mopirma og kasabutan tali sa Department of Health (DOH)- Zamboanga Peninsula Center for Health and Development, nga gi-representahan ni OIC- Regional Director Joshua G. Brillantes, alang sa paghatag sa Health Emergency Allowance (HEA) ngadto sa tanang eligible health workers dinhi sa dakbayan.
Ang nasangpit nga benipisyo ang nagsumikad sa Akta Republika No. 11712 o nailang Public Health Emergency Benefits and Allowances for Health Care Workers Act nga maghatag og “compensation” sa mga public ug private health workers kinsa exposed niadtong panahon sa COVID-19 pandemic nga nagsugod sa Hulyo 1, 2021.
Ang HEA, sumala pa, dunay 3 ka risk exposure categorization, una mao ang low risk tugbang niini ang kantidad nga Php3,000.00, ikaduha ang medium risk-Php6,000.00 ug ikatulo mao ang high risk-Php9,000.00.
Sumala ni konsehal James P. Verduguez, nga sa pakighinabi niya ngadto kang Dr. Benson Panaguiton sa Corazon C. Aquino Hospital, ang kagamhanang lokal sa Dipolog mao ang mohatag sa listahan sa mga health care workers ngadto sa Rehiyonal nga buhatan sa DOH ug ang na-ulahi mao na ang mopahigayon sa screening ug mo-determinar kon asang kategoriya ang mga health care workers nahisakop.
Si konsehal James Cyril Ruiz III, Chairman sa Committee on Health and Sanitation maoy mipasupot sa nasangpit nga resolusyon ug kini gidasonan dayon sa mga miyembro sa nasangpit nga konseho.
(Source: Dipolog City Government Facebook page)