Cebu City – Temporaryong giserhan sa kagamhanan sa Samboan, Cebu ang ilang RHU o Rural Health Unit nga nahimutang sa Brgy. Poblacion sugod gahapon nunot sa pagpositibo sa coronavirus disease o Covid 19 sa ilang mga kawani.
Suma pa sa advisory sa kagamhanang local, nakadawat silag resulta sa swab test nga nagpakita nga ang mga health workers ug ubang empleyado nataptan sa COVID 19.
Bisan kon ang advisory wala mohatag og numero sa apektadong mga personnel apangiingonnga ang tanang masakiton gibutang na sa kwarantina.
Nunot sa pagtak-op sa RHU, gipahibawo sa munisipyo sa Samboan nga ang ilang Birthing Home gihunong usab ingon man ang laboratory services.
Nag-ingon ang advisory nga ang tanang emergency ug urgent medical concerns i-refer lang una ngadto sa District Hospitals.
Matod sa local nga gobyerno, ang operation sa RHU magpabiling suspendido hangtod di pa maulian ang mga sakop nga gipang-Covid.
Hugot nga bantayan sa munisipyo ang tanang personnel ug kalihokan sa RHU hangtod ma-clear kini sa virus. (Jhon Tadlip/ JTY, photo courtesy by Mherz Ortega Campaner)
(Source: Samboan Rural Health Unit)