DAVAO CITY- Gikomperma sa Bureau of Jail Management and Penology ang pagpailawom sa Red Alert Status sa tanang Prisohan sa tibuok rehiyon onse. Kini ang gibutyag ni Jail Inspector Edo Lobenia ang tigpamaba sa BJMP sa rehiyon onse.
Sumala pa ni Lobenia nga human ang gipatuman nga Oplan Galugad sa Davao City Jail nga nahimutang sa Barangay Maa ning syudad, nagpagula gilayon ug kamanduan ang Department of Justice lakip ang Bureau of Correction kun BuCor.
Gumikan sa kompermasyon sa transaksiyon sa Illegal nga Droga sulod mismo sa Davao City Jail, mokabat sa 70 porsiento ka mga personahe sa BJMP Davao ang gipang ilisan samtang hugot nga gimando ang daghang kabag uhan nga ipatuman sa Prisohan.
“Ang gipuli pod nato nga mga personnels gikan sa ubang mga pasilidad sa region,” Sumala pa ni Lobenia.
Plano sab karon sa BJMP nga ipatuman ang “no contact policy” sa mga dalaw. Buot pasabot nga mag istorya lamang ang piniriso ug dalaw gamit ang telepono nga dunay nakaali sa tunga nga samin. Tumong sa BJMP nga mapabilin ang luwas nga kahimtang sa mga piniriso ug seguraduhon nga di gayud makasulod ang mga ilegal nga butang labi na ang mga hinagiban og ilegal nga druga.
Gisaad karon sa BJMP nga di na masubli ang duguon nga operasyon nga gikamatay sa upat ka mga piniriso ug gikasamad sa tulo ka mga pulis sa Davao City Jail. Gipaklaro sab sa BJMP nga pasakaan nila og kasong administratibo ang opisyal nga nagpositibo sa paggamit og ilegal nga droga, ug dako ang posibilidad nga matanggal kini sa serbisyo.