Cebu City – Gipadayag sa opisyal sa Syudad sa Sugbo nga dili flyover ang solusyon sa problema sa traffic sa Syudad sa Sugbo, kundi road widening.
Kini maoy giluwatan nga pamahayag ni Bise Mayor Michael Rama human masayod sa duha ka proposed flyover ug underpass nga tukuron sa Syudad.
Ang Department of Public Works and Highways (DPWH) mi propose nga motukod ug duha ka flyover diha sa Dan P. del Rosario gikan sa junction sa Osmena Boulevard ngadto sa Leon Kilat St, nga dunay gilay-on nga 1.1 ka kilometro, ang ikaduha anha sa N. Bacalso Avenue corner V. Rama Avenue, nga dunay distansya nga 1.2 kilometro.
Samtang ang 915 metros nga underpass adto tukoron sa South Road Properties (SRP) sa Mambaling corner Cebu South Coastal Road.
Matod ni Rama nga angayang seryosohon pagsusi ang proposed flyover.
“As I have been very clear, the priority is not flyover, the priority is road widening, mao gyud na,” gitataw ni Rama.
Niadtong April 15, 2021, ang DPWH uban sa ilang consultant, mipahigayon ug public consultation nga gitambongan sa pipila ka mga barangay opisyal ug mga private property owners.
Coordination sa hingtungdan nga LGU
Sa iyang bahin, si Cebu City Mayor Edgar Labella mipadayag nga ila gyung i-apil ang Cebu City Government sa public consultation
Alang ni Labella nga angayang dunay saktong coordination sa City Government sa tanang umaabot nga proyekto sa Syudad sa Sugbo.
Dugang niini nga kinahanglan mo coordinate ang DPWH sa local government unit concerned, kini tungod kay mao ni rule nga ang hingtungdang LGU kinahanglang masayod sa mga proyekto nga gi pondohan sa national.
Nanghinaut ang mayor nga dunay laing consultation nga ipahigayon ug imbitahon ang City officials sama sa mga sakop sa Konseho sa Syudad, mga representante sa executive department nga maglakip sa City Engineering Office ug City Planning and Development Office.
Nagkanayon si Labella nga ang proyekto kihahanglan dili mo conflict sa ubang giplano nga mga proyekto.
Sa ponto ni Rama nga mas importante ang road widening labi na sa Bus Rapid Transit (BRT)
Ang BRT gi target nga ma partially operational sa Disyembre 2021 ug gitakdang ma fully operational sa 2023.
Naghuwat sila si Labella ug Rama sa DPWH sa ipahigayong consultation tali sa City officials aron malakip ang ilang concerns sa pagtoon nga gihimo alang sa proyekto.
Ang DPWH, pinaagi sa ilang consultant, Cedro Engineers, kasamtangang anaa sa detailed engineering design (DED) alang sa proyekto.
Mokabat ug P105 million ang pondo sa DED, nga himoon sud sa walo ka buwan ug gitakdang mahuman sa Agosto 2021. (Jhon Tadlip/JTY)
(News & photo courtesy of Cebu City LGU)
