Naragsakan ni Gob. Matthew Marcos Manotoc iti pannakairubuat met laengen ti bukud a job portal ti Ilocos Norte.
Segun kenkuana, nabayagen a kalikagumna ti pannakaiyestablisar ti nasao a ‘’job search website’’ ti probinsia rason a kiniddawna a marugian daytoy idi karugrugi pay laeng ti pandemia a gubuay ti COVID-19.
Imbatadna a kamaudiananna ket naiyestablisar met laengen ti nasao a website a namnamaenna a mangitunda iti ad-adda pay a panagbalin a ‘’transparent’’ dagiti bakante a posision a pakairamanan ti gobierno.
Inlawlawagna a babaen iti daytoy ket addan ti ‘’hub’’ ti probinsia a pakakitaan kadagiti amin a bakante a pagtrabahoan ken dagiti aplikante.
Inbunannagna a daytoy ket ‘’centralized online’’ para kadagiti amin a kakailian pakairamanan dagiti adda iti sabali a pagilian.
Mainaig iti daytoy, mangnamnama ti gobernador a mausar daytoy ken maipatungpal ti kangrunaan a gagemna a makatulong kadagiti kakailian a mangbirok iti maiyannatup a trabaho para kadakuada.
(Ronald Domingo, RPN DZRL Batac Correspondent)
(Source: Provincial Government of Ilocos Norte)