Wala damha sa usa ka amahan nga si Regalado Jun Argawanon Jr., 61 anyos, may kakulian sa iyang tiil ug taga-Barangay Malandag, Malungon, Sarangani Province, nga ang iyang simpleng gipangayo sa kahitas-an nga makabaton og usa ka kabayo magamit sa iyang mga kalihukan, hilabi na ang pagkugi sa pagkuha ug hatud matag semana sa mga learning module alang sa iyang mga anak nga nagtungha sa Malandag Central Elementary School SPED Center, ang adunay katumanan.
Niagi lang adlaw nga Lunes, Marso 1, nadawat na ni Tatay Jun ang himsog nga kabayo gikan sa personal nga pondo ni Governor Steve Chiongbian Solon. Nahimong tulay sa maong PWD nga amahan ang mga magtutudlo sa gi-eskwelahan sa iyang mga anak, hilabi na si Teacher Juliet Oliveros-De Luna, nga makaduol sa opisina ni Governor Solon nga dugay na usab adunay programa gitawag nga Serbisyong Sarangan Community Outreach alang sa mga person with disability, mga bata nga may balatian sa cerebral palsy, ug kadtong mga senior citizen nga na-stroke.
Nakapatulo sa iyang mga luha si Ma’am Alma Gregorio, magtutudlo sa mga kabataan nga adunay diperensya sa pandungog sa Malandag Central Elementary School. Duha (2) matud pa ang anak ni Argawanon nga nag-eskwela kanila, Grade 2 ang usa, ang ikaduha special child may balatian nga hydrocephalus.
May diperensya ang linaktan ni Argawanon tungod baynte tres (23) pa lang ang edad niini, nahulog sya sa waterfalls, wala na kini tuhui nga mabuhi pa tungod sa gilawmon sa maong falls.
Sayod sila School Principal Milagros Secreto sa kahimtang sa pamilya nga anaa na lang gani nagpuyo duol sa sapa, sa yuta lang pud gahaling alang sa ilang makaon. Walay tarong pangita si Tatay Regalado, naghulat sa mga silingan kung adunay magpa-hornal ug paguna.
Maayo na lang may binulang tabang kini gikan sa DSWD isip senior citizen, na-myembro pud iyang pamilya sa 4Ps. Pursigido kini nga suportahan ang edukasyon sa iyang mga anak. Aktibo usab kini sa simbahan isip tigsangyaw sa maayong balita.
Buot ipabatyag ni Ma’am Gregorio nga tungod sa pagka-inspirado ni Tatay Jun manginabuhi gumikan sa iyang dakong pagsalig sa Ginoo, mabatyagan sa PWD Tatay nga daghan ang nagpangga kaniya ug labaw sa tanan ginadungog ang iyang makanunayon nga pagsangpit sa kalangitan.
Gawas sa kabayo nga dili na maka-pamasahe sa pagkuha-hatud sa mga module ug padayong makasangyaw sa mga maayong pulong sa Bibliya sa kabukiran, nagtampo-tampo pud ang mga magtutudlo ug ilang mga higala gamit ang Facebook. Tuod man, nakadawat usab ang pamilya ni Tatay Jun og portable nga lababo, maguyod-guyod kini nga lababo, may mga gamit pang-kusina pa, mga senina, groceries ug ayudang salapi. Gipakaon pa sila, gi-setup nga adunay birthday apan diay ang paghatag na sa mga ayuda.
Taliwala sa pandemya, nagpadayon ang programa ni Governor Solon. Kontakon lang sila Program Manager Ms. Asma Akmad ug Certified Wheelchair Assessor Jhukarnen Jamalol agi sa opisina sa MSWDO sa mga munisipyo, kadtong nanginahanglan og wheelchair ug ang pag-physical therapy sa mga adunay cerebral palsy ug nanga-stroke nga kabanay, sa pagsuporta kana nila Senador Manny ug Congressman Ruel Pacquiao, Vice Governor Elmer De Peralta, mga board member ug mga mayores.
(Provincial Information Office – Sarangani)
