Dos wanted personas ya aresta el pulisiya local na separao implementacion de orden de aresto aqui na ciudad de Zamboanga.
Con el maga arestao wanted personas ya nombra el pulisiya como canda Khalid Alamia, veinte seis años, y si Rosalyn Flores, treynta’y siete años el edad.
Asegun con Police Major Sonny Boy Perez, hefe del Zamboanga City Police Office’s (ZCPO) Station 6, cay con Alamia ya aresta maga alas Dos Veinte Cuatro del Lunes tarde na Purok 1, Barangay Arena Blanco, este ciudad.
Asegun con Perez cay si Alamia tiene pendiente orden de aresto por violacion del Seccion 2 en relasyon con el Seccion 14 del Acto Republica numero 10643 o mas conosido como el graphic health warning law.
El jusgado de Calamba-Baliangao, Misamis Occidental que ya dale el orden de aresto contra con Alamia ya recomenda el pago de tres mil pesos piansa para el temporaryo libertad de Alamia myentras ta conduci vista na caso del acusao.
Myentrastanto, asegun con Police Major Albert Alfaro, el hefe del ZCPO’s Station 11, con Flores ya aresta maga alas onse sincuenta de del Lunes aga na Governor Lim Avenue, Barangay Zone 1, este ciudad.
Si Alfaro ya habla cay si Flores tiene pendiente orden de aresto por el asunto de amenaso y unjust vexation con el piansa de mil peso desde el un jusdado del ciudad de Zamboanga. (B. Garcia)