Uban sa pagduyog ug pakighiusa sa numero unong prayoridad sa administrasyon ni Governor Rosalina “Nene” Jalosjos nga mao ang maayong panglawas, mipabati sa iyang dakong pagpasalamat si Dr. Oswaldo Lamdag ngadto sa Inahan ning lalawigan ug sa Department of Health sa pagkahimugso sa usa ka multi-million project sulod sa Zamboanga del Norte Medical Center compound, nga nahimutang sa Barangay Sicayab, ning Dakbayan sa Dipolog.
Ang pamahayag giluwatan ni Dr. Lamdag, Officer-in-Charge, sa Zamboanga del Norte Medical Center sa gipahigayong ground-breaking ceremony sa 3 ka andanang !50 million pesos nga Surgery Complex Building sa likod nga bahin sa ZNMC.
Matod pa ni Dr. Lamdag, dako ang iyang gibating kalipay dili lang para sa Dakbayan sa Dipolog kundili sa tibuok probinsiya tungod kay nahimong recipient ang ZNMC sa maong proyekto.
Apan mas iyang gikahinaman nga mabati sa katawhan, kinsa mao ang tinuod nga resipiyente sa ayuda nga gibubo sa DOH dinhi sa atong probinsiya, kon unsa ang kapuslanan niini alang kanila.
Apan taliwala sa iyang gibating kalipay ug kahinam sa gilaumang pagbarog sa bag-ong surgical complex building, wala usab gikalimod ni Dr. Lamdag ang iyang gibating kabalaka sa kasamtangang problema sa ZNMC nga mao ang kakulangan sa mga nurses ug mga Medtechs.
Matod pa ni Dr. Lamdag, gusto nilang ibalik ang kanhing private rooms nga gihimong isolation room panahon sa COVID-19 pandemic, apan dili mahimo gumikan sa kakulangan sa mga nurse nga moatiman sa mga pasyenteng masulod niini tungod sa pagpanggawas sa mga nurses ngadto sa laing nasod gumikan sa mas taas nga suweldo.
Alayon niini, gihagit sa Hepe sa ZNMC ang mga Medical Schools ug Nursing Colleges sa atong lalawigan, pagkumbinsi sa ilang mga graduates nga moggahin ug 1 o 2 ka tuig aron moalagad sa Zamboanga del Norte Medical Center.
(Source: Provincial Information Center Zanorte Facebook page)