31.9 C
Manila
Saturday, April 13, 2024

Pulis Nga Kanhi Aide Sa Usa Ka Narco General Gipatay

- Advertisement -

Patay ang usa ka pulis nga nahimong aide/driver sa miretiro nga Police General nga si Marcelo Garbo, sa dihang gipusil kini sa gawas sa ilang pinuy-anan sa Barangay Pit-os, Cebu City sa kaadlawon sa Domingo, December 23, 2018.

Ang biktima giila sa kapolisan nga si PO2 Romeo Jumalon kinsa nahimong aide/driver ni kanhi Philippine National Police (PNP) Deputy Director General Garbo nga maoy pangulo kaniadto sa Police Regional Office (PRO-7), Central Visayas sukad sa tuig 2011 hangtud sa 2013.

Si Garbo nalakip sa mga police generals nga gitumbok nga drug protectors mismo ni Presidente Rodrigo Duterte niadtong July 2016. Ang uban nga giingong mga “narco-generals” naglakip kanila ni Retired Chief  Superintendent Vicente Loot nga Mayor karon sa lungsod sa Daanbantayan, Cebu; Chief Superintendent Edgardo Tinio ug Chief Superintendent Bernardo Diaz.

Gituhoan nga si Garbo nakabiya na sa nasud ug wala na masayri kon hain karon ang nahisgutang kanhi Police General.

Gibutyag ni Chief Inspector Alvin Llamedo, Talamban Police Station Chief nga padayon karon nila nga gisusi ang mga circumstancia bahin sa pagpanerbisyo ni Jumalon isip aide/driver ni Garbo kon may kalambigitan ba kini sa kamatayon sa biktima.

Nakigtambayayong na karon ang Talamban Police Station sa PRO-7 Regional Personnel Holding Administrative Office (RPHAO) diin nadestino si Jumalon sukad adtong 2016.

Matud ni Llamedo nga sa panahon sa termino ni Garbo, ni-Absent-Without-Official Leave (AWOL) si Jumalon sulod sa pipila ka mga buwan hinungdan nga gipalagpot kini sa serbisyo niadtong 2012. Apan nakabalik sa serbisyo si Jumalon niadtong 2016 human kini makaduso sa iyang Motion for Reconsideration.

Gipasabot ni Llamedo nga critical point sa ilang imbestigasyon ang panahon sukad nga nataktak ug usab nakabalik sa serbisyo ang biktima.

Karong adlawa matud ni Llamedo nga makigtagbo sila sa mga tinugyanan sa PRO-7 aron ilang masusi ang records sa kaso ni Jumalon niadtong 2012.

Nasayran nga si Jumalon nangandam na unta uban sa iyang asawa aron pagtambong sa misa de gallo niadtong kaadlawon sa December 23, sa dihang usa nagmaskara nga tawo mipusil sa biktima sa makadaghang higayon.

Matud sa asawa sa biktima nga nagsusi sa makina sa ilang sakyanan ang iyang bana niadtong higayona sa dihang mihunong ang usa ka gray nga kotse ug nanaog ang usa ka nagmaskara nga lalaki ug mipusil dayon sa iyang bana.

- Advertisement -

Leave a Reply

- Advertisement -

Related Articles

- Advertisement -
- Advertisement -

Latest Articles

- Advertisement -