Padayong gi-awhag ang katawhan sa Cagayan de Oro nga magpabakuna na batok COVID-19 sa pinakaduol nga barangay-based vaccination sites diha sa Bongbongon Elementary School sa Kauswagan, Cugman Elementary School, Bugo Elementary School ug Lumbia Elementary School.
Gituyo ang pag-abri niini nga mga vaccination centers sa barangay aron mas pabor sa katawhan, ug di na maglisod pag-adto sa city mega vaccination sites.
Ang vaccine rollout sa syudad naglangkob pa gihapon sa priority groups A1, A2, A3, A4 ug A5.
Gihangyo ni Dr. Teodoro Yu Jr., medical officer sa City Health Office, ang publiko nga dili na maghulat sa ‘preferred’ nga brand sa bakuna, sanglit ang tanang COVID-19 vaccines adunay emergency use authorization sa Philippine Food and Drug Administration, ug kini luwas ug epektibo aron malikay sa ‘severe cases’ sa COVID-19 infection.
(Source: City Health Office)