Bentahe ti gobierno probinsial kangrunaan ti Governor Roque Ablan Senior Memorial Hospital wenno GRASMH ti resolution nga inaprobaran ti sangguniang Panlalawigan babaen ken ni Vice Governor Cecilia Araneta Marcos.
Ti nasao a resolution ket pakaseknan ti panangipalubos ken ni Governor Matthew Marcos Manotoc a mangibagi ti probinsia tapno maadaan ti katulagan iti San Nicolas Laboratory, Inc wenno Hi-Precision.
Segun ken ni Dr. Wilberg Samonte, Hospital Administrator ti nasao a balay pagagasan, ti nassao nga addang ket maysa kadagiti kasapulan ti hospital para ti level 3 accreditation ti Department of Health wenno DOH.
Inlawlawagna a ti specimen kas ti isbo, dara, ken dadduma pay manipud kadagiti pasyente a nasken a maipadalan ti Laboratory ket mabalin a direkta nga alaen ti Hi-precision ken saan a parikot ti pannakaibyahe gapu ta asideg laeng ti hospital iti nasao a laboratory ti San Nicolas.
Impasigurado ni Ms. Shirley Mae Cacang, Manager ti Hi-precision a noman pay saan a Philhealth Accredited ti laboratory ket maipaayan latta ti diskwento dagiti senior citizen ken maadal no kasano ti pannakaipaay ti diskwento kadagiti opisial ken empleados ti gobierno probinsial.
Ti nasao a resolution ket inaprobaran kabayatan ti maikadwa ken pinal a panagdingngeg ti Sangguniang Panlalawigan.