Cebu City- Naghulma ang kagamhanang panlalawigan og task force nga tahasan pag-monitor sa mga tindahan nga namaligya sa nag-unang mga palaliton.
Pinaagi sa giluwatang Executive Ordder no. 11 ni Gob. Gwendolyn Garcia, giumol ang Cebu Provincial Price Control Task Force.
Ang naasoyng EO maoy resulta sa miting sa Cebu Provincial Price Coordinating Council niadtong Marso 16.
Ang maong  task force moabag sa price freeze nga gipatuman sa Department of Trade Industry kun DTI sa basic goods  — usa ka pamaagi pagpugong sa dili makataronganong pagsaka sa presyo sa mga palitonon taliwa sa hulga sa coronavirus disease kun Covid 19.
Gipaabot usab ang paghimo sa grupo og inspeksyon sa mga patigayon nga nalambigit sa pagpamalit ug pagbaligya sa sa nag-unang palaliton sa tibuok lalawigan.
Segun sa EO, himoon ang pagsiksik para pag-ila kon ang presyo gi-regulate ba ug pagseguro nga ang mga retailers ug outlets motuman sa price ceilingnga gilatid sa Cebu Provincial Price Coordinating Council.
Ang mga sakop sa task force naglakipsa Agribusiness Chief Division sa Department of Agriculture (DA), Director sa Department of Energy, Provincial Manager sa National Food Authority, Department Manager sa Regional Department of the Sugar Regulatory Administration, Provincial Social Welfare & Development Officer, Cebu Provincial Prosecutor, mga Presidente sa Cebu Chamber of Commerce & Industry, Mandaue Chamber of Commerce & Industry, ug Philippine Retailers Association-Cebu nga pangulohan sa director sa DTI.