Namahayag ang Presidente sa Payawan II Urban Poor Organization nga si MR. RAMIL SUHIAN kabahin sa iyang kaso nga Illegal Construction hinungdan nga kini gisilbihan ug Warrant of Arrest sa mga personahe sa CIDG RFU 13 SDN. Gawasnon na si Suhian human nakaandam ug pangpyansa na dose mil ka pesos.
Sa interview, giingon niini nga nagsumikad kini sa pagpadala sa City Engineering Office ug mga notices alang sa 112 ka mga structure/building sa ilang area sa Sitio Payawan II, Km. 3, Brgy. Luna, ning dakbayan nga matud pa, wala’y natigayong aktuwal nga pag inspeksyon tungod kay aduna’y mga gipadalhan ug notices nga wala’y mga balay ug aduna usab giapil bisan pa man nga aduna na’y building permit.
Sumala ni Mr. Suhian nga angayan lamang mulihok ang City Building Official kung aduna na gyud hingpit o klaro nga pagpamatuod ang Una Mioris Realty Corporation (UMRC) sa pagpanag-iya sa gi-claim nilang 5,179 sq. mts. nga luna sa yuta.
Panawagan ni Mr. Suhian nga ihatag usab kanila ang patas ug sakto nga pagtagad sa kaso basi na sa konstitusyon nga aduna’y mga katungod sa pagpuyo ang mga Pilipino sa kaugalingon niining nasud nga dili angayang tawgong mga squatter.
Gipaabot usab ni Mr. Suhian ngadto sa UMRC nga mufile na ug civil case sa korte aron didto nila ilatag ang ilang mga dokumento.
Matud pa ni Mr. Suhian nga dili siya mahadlok o maluja sa pagproteher alang sa katungod sa ilang organisasyon nga mapatigbabaw ang kamatuoran. (Jun Prex Salubre, Ronda 6 RPN DXKS)
Link on the report where Suhian was arrested: https://www.facebook.com/1427050990643243/posts/4221982321150082/
