Gitakdang magbukas ang kagamhanan sa dakbayan sa Lapulapu og laing building sa LCC o Lapulapu City College aron himoong isolation facility tungod sa nagsaka nga mga kaso sa Coronavirus Disease o COVID-19 sa maong siyudad.
Si Dr. Agnes Realiza, pangu sa CHO o City Health Office, miingon nga pagkakaron, duha ka bilding sa LCC ang gigamit nga isolation facility sa mga pasyente nga asymptomatic.
Ang unang pasilidad maka-accommodate og 80 ka pasyente nga karon napuno samtang ang ikaduha masud og 110 ka tawo.
Gitug-an ni Realiza nga nagpahigayon silag ocular inspection sa ikatulong edipisyo gahapon aron pagpahimutang sa mga higdaanan ug ubang pagpangandam.
Sa pikas bahin, gimando ni Realiza ang pagbakante sa isolation facility duol sa Hoops Dome sa brgy. Gun-ob.
Matod niya, ang maong pasilidad gamiton pagkwarantina sa mga pasyente nga nagpakitag kasarangang sintoma sa sakit.
Nagkanayon si Dr. Realiza nga aduna untay11 ka OFWs o Overseas Filipino Workers ug usa ka ROF o Returning Overseas Filipino ang nag-okupar sa maong pasilidad apan karon anaa na kini sa mga hotel nga accredited sa DOT o Department of Tourism ug DOH o Department of Health. l via Jhon Tadlip/JTY
Source: City Health Office-Lapu-Lapu City
Photo: Lapu-Lapu City PIO