Iriga City – Labi-labi an kamunduan ni Alcalde Madel Yorobe Alfelor sa panibagong pag-distroso sa City Park kan Iriga, kun sain tinuyong sinulo an sarong poste kaini dalan tanganing magin madiklom an ibang parte kan plaza kasu-bangui.
Inot kaini, hinabunan na an City Park, asin dai pa nakontento na pinagtutubudan tinuyong sinulo kan dai pa mabistong persona O mga persona.
Katakod kaini, nangapudan na an Alcalde sa mga namamanwaan na kun siisay man an may pagka-aram dapit sa krimen tulos na magsumbong sa mga awtoridad.
Sigun sa alcalde kagibuhan ini kan mga persona na mayong pagmakulog sa kagayonan kan cuidad, na mas maray pang humali na sana.
Kun magigirumduman, nabubukasan pa sana an inaapod na pinakamagayon na plaza sa rehiyon kan nagtalikod na bulan, alagad magkapirang beses ng pinagsabotahe.
Pinag-plano soboot an panunulo, mientras na an mga awtoridad padagos pa man an pinag-gigibong imbestigasyon sa krimen.
Mientras tanto, Pinaboran ni Konsejal Sonny Magistrado kan Iriga an pagpataw nin kastigo sa ki-isay man na madadakop na nasa likod kan pag-distroso sa bagong mairahay na city park kan cuidad.
Ini an nagin reaksyon kan konsejal matapos na magpahayag nin kamunduan si alcalde Madel Yorobe Alfelor sa nangyayaring vandalism asin looting sa plaza na an huri kan petsa 12 kun sain maski an bombilya asin wire sa dancing fountain ini kinua kan dai pa mabistong persona O mga persona.
Tinaw’an nin duon kan konsejal na sa ngunian igua nan in ginigibong ordinansa an sangguniang panglungsod tanganing maregulate an gabos na malaog sa city park kasabay kan pag-bilog nin sarong management team na iyo an maasikaso kan gabos na aktibidad sa laog kan plaza.
Alagad, paramientras na mayo pa kaini igua naman nin mga national asin local laws na pueding basihan kan mga gigibohon na lakdang, orog pa kun mabisto an mga nasa likod kan panraraot asin pag-distroso.
Namumundo an konsejal sa nasabing pangyayari kun sain binibisto an city park kan Iriga na iyo an pinakamagayon na plaza sa kabikolan, alagad dai pinagmamakulgan kan ibang pasaway. (OIC Melvin Barayoga, photos courtesy of City Government of Iriga)
