Cebu City – Tulo ang patay sa aksidente sa dalan nga mitumaw sa highway sa Brgy. Buanoy, Balamban, Cebu gahapon sa kaadlawon.
Ang tulo sakay sa motorsiklo nga nadasmag sa wing van truck nga gimaneho ni Renerio Remo, 46, sa Brgy. Canduman, Mandaue City nga paingon untang modemano.
Hangtod gahapon, gitanggong pa si Remo samtang gipaabot sa kapolisan ang mga kabanay sa mga namatay aron pagsuta kon mokeha ba kini o dili.
Si Major Christian Torres, hepe sa kapolisan sa Balamban, miila sa mga nakalas nga sila si William Dominic Pierson, Danny Sultan, ug Steve Son nga pulos 23 anyos.
Sila si Sultan ug Son nagpuyo sa Brgy. Aliwanay, Balamban samtang si Pierson sa Brgy. Baliwagan, Balamban.
Base sa imbestigasyon sa kapolisan, si Remo nga paingon nang mobalik gikang naghatod og feeds sa poultry farm misuway pagpatipas sa ten-wheeler truck paingon sa highway.
Apan tungod kay taas man ang wing van, mikawat si Remo sa pikas lane aron maka-right turn.
Matod ni Major Torres, sa dihang misuway na si Remo pagkompleto sa pagtipas, iyang namatikdan nga adunay mipaka sa walang kilid sa trak ug sa iyang pagsusi, iyang nakita ang nagbuy-od nga mga biktima uban sa motorsiklo.
Gitug-an ni Torres nga si Pierson ang nagmaneho sa Yamaha scooter nga giangkasan nila ni Sultan ug Son nga way mga helmet. (Jhon Tadlip / JTY)
(Source: Municipality of Balamban Police Station)