Cebu City – Kutob na lang sa 100 ka kliyente ang gitugtang makasulod sa mga ahensiya sa kagamhanan nga anaa sa J Mall sa Brgy. Bakilid, dakbayan sa Mandaue matag adlaw.
Kini nunot sa report nga nadawat sa MCLEU o Mandaue City Legal Enforcement Unit nga wala na magtamod ang ubang naglinya sa social distancing policy.
Nahinabi sa media, si Edwin Jumao-as, pangu sa MCLEU, miingon nga ila nang  giadto ug gisultihan ang mga guwardiya bahin sa kausaban sa lagda.
Lakip sa mga buhatan sa gobyerno nga anaa sa naasoyng mol mao ang SSS o Social Security System (SSS), Home Development Mutual Fund o Pag-ibig, ug LTO o Land Transportation Office.
Gitataw  ni Jumao-as nga walay problema sa social distancing sulod sa mga ahensya apan sa gawas nagdasok ang naglinya nga mga tawo.
Tungod niini, nakahukom ang MCLEU nga kutohan na lang ang gidaghanon sa mga kliyente nga dawaton sa usa ka adlaw.
Gipasalig usab sa mga ahensiya ang pagsanong sa sugyot sa MCLEU aron matuman ang social distancing.
Ang LTO giingong modawat kutob sa 100 samtang ang Pag-ibig ug SSS tag-50 lang ka kliyente ang atimanon. (Jhon Tadlip / JTY)
(Source : Mandaue City Legal Enforcement Unit)