Davao del Norte – Nakadayeg si Mindanao Development Authority (MINDA) Chair Secretary Emmanuel Piñol kang Kuya Gov. Edwin I. Jubahib ug 1st District Congressman Pantaleon Alvarez sa daghang mga proyekto nga ilang gipatuman alang pag-uswag sa mga IPs.
Sa pagtuyok karong adlawa ni Sec. Piñol, kauban ang duha ka haligi sa Davao del Norte, sa mga proyekto sa probinsya alang IPs, misaludo kini sa ilang paghatag og daghang mga proyekto aron mahaw-as sa kalisod ang mga tribu.
“This is something that we really have to appreciate, pagdating sa leadership ni Gov. Jubahib, kasama si (former) Speaker Pantaleon Alvarez,” sulti Piñol.
Gidayeg sa MINDA Chair ang maayong dalan padulong sa bukid-bukid nga Sitio Tawinian sa Barangay Gupitan, sa lungsod sa Kapalong, kapin 80 kilometros gikan Tagum City, diin pila na lang ka kilometro ang wala pa masemento.
Didto nanukad ang gihimo nga bag-ong kalsada padulong sa Sitio Mondol, rdiin nakigpulong ang mga opisyales sa mga tribal leaders sa Sitio Tapayanon, dungan sa pagpanghatag sa mga food packs ug materyales sa balay. Kapin gatos ka tuig na wala naabot sa gobyerno hangtud madiskobre sa militar ang maong lugar sa milabay nga tuig ug malingkawas kini gikan sa mga kamot sa NPA.
Gipangitaan og paagi ni Kuya Gov, sa tabang ni Alvarez, aron mahimoan og kalsada ang halayo nga lugar aron mas daling mahatud ang mga nag-unang serbisyo nga gikinahanglan sa mga IPs. Gawas kini sa programang pabalay, livelihood projects ug uban pa nga iyang gipaningkamutan alang nila.
“The fact na nagawan na ng kalsada ni Gov, this is already a monumental achievement, as far as government is concerned,” ingon ni Piñol.
Dayon milahos pagkahapon ang convoy sa kapin 30 ka sakyanan sa Talaingod aron tan-awon ang mga proyekto ni Kuya Gob nga Multiplier Farm sa Sitio Salawao, diin nagsugod na ug padaghan sa mga manok nga ipang-apod-apod sa mga IPs ug pamilyang Dabaonon, ubos sa DavNor KAAGAPAY Program.
Ulahing giadtoan sa grupo ang Agro-forestry Demonstration Farm sa Sitio Milako, diin gihimuan og maayong dalan ug gitamnan sa libo-libong semilya sa high-value crops aron modako ang kita sa mga IPs.
Tungud sa kalsada ni Kuya Gob, ang kanhi bayad nga ₱ 200 aron lang ipanaog ang ilang produkto sa highway nahimo na lang nga ₱ 20.
“Hanga ako sa ginawa ni Gov dahil pinatunayan niya na ang rural infrastructure is the key to development,” paghinapos ni Sec. Piñol, dungan sa pagpasalig sa iyang dakong suporta alang kalampusan sa mga proyekto ni Kuya Gob.
Dungan sab niini nga pagbisita sa opisyal ang iyang pag-shoot alang sa tulo ka episode sa iyang segment nga Beauty & Bounty of Mindanao! sa iyang sikat nga Facebook Page nga Manny Piñol.
Kauban sa convoy sila Army 10th Infantry Division Gen. Reuben Basiao, Kapalong Mayor Ma. Theresa Timbol, Vice Mayor Edgardo Timbol, Talaingod Mayor Jonie Libayao, DNPPO Chief PCol. Ranie Hachuela 60th IB commander Lt. Col. Ronaldo Sarmiento, 56th IB chief Lt. Col. Norman Valdez, ug uban pang mga opisyales.
(Noel Baguio, PICKMO, OIC Michael Manguhig, RPN DXKT Davao)
