Nagmalampuson ang usa ka demonstration ug mini-tournament sa dula nga pickle ball nga gipahigayon diha sa city hall quadrangle, Martes, Agosto 8 ning syudad.
Kahinumduman nga mibisita sa buhatan ni Mayor Klarex Uy bag-ohay lamang si Pastor Junnie Ree Pagunsan, Senior Pastor sa Far West End Seventh Day Adventist Church sa USA, aron ipaila-ila sa mga Kagayanon ang pickle ball, usa ka klase sa dula sa mga Amerikano nga kombinasyon sa lawn tennis, badminton ug table tennis.
Ang pickle ball mini-tournament ug demonstration gipangulohan sa mga instructors gikan sa University of Science and Technology of Southern Philippines (USTP), kinsa mga miyembro sa Professional Pickleball of the Philippines Association.
Ang pagpaila-ila sa pickle ball kabahin sa pagpalig-on sa sister-city relations tali sa Cagayan de Oro ug Norfolk City, Virginia, USA pinaagi sa natad sa paugnat sa kusog.
Nagpakita sa iyang suporta si City Councilor Suzette Magtajas-Daba, kinsa maoy chairperson sa Committee on Sister City Relations sa konseho ning syudad, diin iyang gipadayag ang kamahinungdanon sa paugnat sa kusog aron malikayan ang ilegal nga druga ug dautang mga bisyo.
Nahimong kampeon ang barangay Carmen sa mixed doubles; samtang kampeon usab sila si Kristina Nadine Velasco (CHIO) ug Marian Casinillo sa City Engineering Office sa women’s doubles; ug Augusto Daba (CHIO) ug Engr. Kent Malalis (CEO) sa men’s doubles.
Nagpasalamat ang mga kadagkoan sa Higalaay Festival Committee, City Tourism and Cultural Affairs Office, ORO-TIPC ug City Sports Development Office sa suporta ni Mayor Klarex Uy aron paghatag og dugang kalingawan sa kasaluogan sa Higalaay Festival 2023.