Iriga City – Liwat na pinag-atubang kan kampo ninda konsejal Edsel Dimaiwat, Boboy Guevarra asin Atty. Santiago Ortega an petition na naghahagad sa korte na papondohon an pagpapagibo kan Amusement Park sa sitio Ilian, brgy. San Nicolas, cuidad na ini na inot naman na binawi.
Apuera kaini, hinagad pa kan grupo na suspendiron kan korte an nakatalaan nap ag-utang kan local na gobierno kan Iriga nin maabot sa 275 milyones pesos sa bangko tanganing gamiton sa nasabing proyekto.
Iyo ini an ipinahayag ni konsejal Edsel Dimaiwat kasabay kan paglinaw na igua sana nin binago sa nainot na reklamo tanganing mas magin magabat kasunod kan paglaom na dagos ng tutubudon kan korte.
Liwat na inotro kan konsejal na dai sinda nag-uulang sa kauswagan kan Iriga, alagad sala sa timing an nasabing proyekto, mientras na yaon kita sa pandemya na dai tinutugutan an mga aktibidad sa amusement park, imbes mas maray kun magsentro nguna sa pagpagibo kan city hospital na mas makakatabang sa presenting panahon.
Pinagtaw’an pa nin duon kan konsejal na inot naman soboot na ibinasura kan Sangguniang Panglalawigan an planong pag-utang, alagad dai maaraman kun ta’no ta ipinapadagos ini kan local na gobierno asin an ibang mga ordinansa na pinag-iimplementar.
Sinabi pa ni Dimaiwat na kun aamendaran sana kan city hall an uutangon na kuwarta pasiring sa city hospital, sainda ining susuportaran.
Mientras tanto, tinuyaw pa ni konsejal Dimaiwat an tulong beses na pagkakaigua nin bulang sa laog nin sarong simana sa Iriga City Sports Arena.
Sigun sa konsejal, bako ng reasonable an pagkakaigua nin tulong beses na bulang sa laog nin sarong simana apuera sa aldaw na Domingo na iyo an tinutugot kan ley.
Saiyang sinabi na baka magin kausa ini sa paglangkaw nin mga kaso sa cuidad, huli ta imbes ng ilaog sa trabaho kan mga aficionado sa bulangan n asana magduman.
Alagad an mayoriya kan Sangguniang Panglungsod kan Iriga an nanindugan na tama an saindang approval sa mga pa-bulang huli sa ingreso kaining dinadara sa cuidad.
Lininaw pa ninda na an mga naglalaog man sana sa bulangan iyo an mga para-bulang, mientras na an may mga trabaho dai man nagbubulang kun igua nin gibo.
(Source: Interview with Edsel Dimaiwat)
