Gipahigayon ang usa ka panagtigum sa mga nagkadaiyang mayor dinhi sa probinsya sa Zamboanga del Norte alang sa usa ka People’s Initiative alang sa pag-amenda sa Sec. 6, Art. 10 sa 1987 Constitution kaniadtong Marso 29, adlaw’ng Lunes, ning tuiga nga nagsugod sa may alas-10:00 ang takna sa buntag didto sa Zamboanga del Norte Convention and Exhibition Center, Plenary Hall ning dakbayan ilawom sa pasiugda sa League of Provinces.
Ang maong panagtigum ang gitambongan ni City Mayor Darel Dexter T. Uy, kinsa mipadayag sa iyang mga tinguha kabahin sa maong petisyon atol sa gipahigayon nga “open forum”, uban kanila ni ZN Provincial Vice Governor, Hon. Senen O. Angeles, kinsa mipabati sa iyang mensahe kabahin sa importansya ug tumong sa maong kalihokan, ug ZN Provincial Governor, Hon. Roberto Y. Uy, nga mipabati usab sa iyang pagpasalamat sa malampusong pagpahigayon sa maong tigum lakip na sa mga mitambong niini.
Lakip usab sa mitambong mao sila si Atty. Elro Mar L. Tabiliran gikan sa Provincial Legal Office, nga mao’y mituki kabahin sa Sec. 6, Art. 10 sa 1987 Constitution ug ang mga disbentaha niini lakip na ang proseso sa paghimo sa nasangpit nga inisyatiba, uban sa pipila ka mga mayor sa matag Kagamhanang Lokal dinhi sa lalawigan ug ang ilang mga representates.
Tumong sa maong panagtigum ang pagpahibalo sa laraw nga maghimo ug usa ka People’s Initiative alang sa pag-amenda sa nasangpit nga balaod, pinaagi sa pagpadas-ug sa usa ka petisyon ug “signature gathering”, nga masaka ang “Internal Revenue Allotment” kon IRA sa matag Lokal nga Kagamhanan gikan sa kwarenta porsyento (40%) ngadto sa singkwenta porsyento (50%) o labaw pa niini.
Kahibaloan nga anaa lamang sa kwarenta porsyento (40%) ang kasamtangang IRA nga madawat sa mga Lokal nga Kagamhanan. Matud pa sa hamubong pagtuki niini ni Atty. Tabiliran, dili kini igo aron masiguro ang dali ug epektibo nga paghatud sa mga “basic services” ug pagpatuman sa mga proyekto sa mga katawhan ilabina sa karon ning krisis sa pandemya. (City Information Office-jnp)