Opisyal na kabii tagpasiga an mga Christmas lights sanan dekorasyon sa Kapitolyo. Kini human sa Culmination Program sa Children’s Month na may tri-division contest sa parol, pagkanta sanan acoustic guitar.
Si Provincial Spokesman Sim Castrence amoy nagrepresentar kan Governor Francisco Matugas kahapon samtang may virtual message si Provincial Administrator Sol Matugas.
An capitol lights tagconceptualized nila Culture and Arts Consultant Arturo Cruje iban ni Harold Antallan. An mga poinsettia gi-design gamit an 200 ka pajong na bisan wayay lighting, makita an colorful painting sa decorations kon adlawan.
Taliwala sa nasinating pandemya, an administrasyon sa Surigao del Norte government tagpanguyohan ni Governor Francisco “Lalo” Matugas sanan Vice Governor Eddie “Geed” Gokiangkee Jr. padajon naningkamot na mokunhod an ihap sa mga nagka CoViD-19 sa syudad sanan kalungsuran. An mga trabahante sa kapitolyo tagpaubos sa Antigen testing.
Kuman na Pasko makadawat an mga trabahante nan CNA Incentive na tig 20,000 pesos para sa mga regular sanan 10,000 para sa mga casual na trabahante.
(RPN DXKS Surigao, photos courtesy by Atty. Aimee Faith Egay)
