Nagmalampuson ang pagpahigayon sa “Parent-Teen Talks” didto sa lima (5) ka piniling mga barangay dinhi sa dakbayan kaniadtong Septiyembre 30, ning tuiga. Nasayran nga ang mga nasangpit nga barangay mao ang Brgy. Cogon, Galas, Sangkol, Sicayab ug Sinaman, kinsa mao’y mga napili’ng barangay base sa kaso sa “teenage pregnancy” sa ilang lugar.
Ang maong kalihokan ang gipangunahan sa buhatan sa Commission on Population (POPCOM) uban sa pakigtambayayong sa City Health Office, City Social Welfare and Development Office, Sangguniang Kabataan ug The Challenge Initiative – Zuellig Family Foundation, tanan dinhi sa dakbayan. Dugang nasayran nga ang mga partisipantes sa “Parent-Teen Talks: Training of Trainers” nga gipahigayon kaniadtong Septiyembre 28, ning tuiga, mao’y nagsibli’ng mga “facilitators” sa nasangpit nga kalihokan.
Tipik sa mga gipangtuki atol sa gipahigayon nga kalihokan mao ang bukas ug epektibong komunikasyon tali sa mga ginikanan ug ilang mga anak, lakip na ang mga tinguha ug isyu kabahin sa “Adolescent and Youth Sexual and Reproductive Health” ug “Teenage Pregnancy”.
Tumong sa nasangpit nga kalihokan nga magiyahan ang mga ginikanan ug anak pinaagi sa pagmugna og maayong relasyon tali kanila isip usa ka paningkamot sa kinatibuk-an nga makunhod ang pagkaylap sa teenage pregnancy dinhi sa lokalidad.
(Source: DIPOLOG CITY GOVERNMENT Facebook page)